नवी मुंबईत १६ लाख १६ हजारांची रोकड जप्त , निवडणूक स्थिर संनिरीक्षण पथकाची कारवाई

 

 

नवी मुंबई | नवी मुंबई महानगरपालिका निवडणूक आचारसंहितेचे पालन होण्याच्या दृष्टीने राज्य निवडणूक आयोगाने दिलेल्या आदेशानुसार नवी मुंबई महानगरपालिकेने शहरात प्रवेशाच्या तसेच मुख्य विविध ९ ठिकाणी दिवसाच्या तिन्ही सत्रांमध्ये २४ तासात २७ स्थिर संनिरीक्षण पथके स्थापन केलेली आहेत. या पथकांमार्फत वाहने व इतर बाबींवर काटेकोर लक्ष ठेवण्यात येत आहे.

 

महापालिका आयुक्त तथा निवडणूक अधिकारी डॉ. कैलास शिंदे यांचे निर्देशानुसार, आचारसंहिता कक्षाचे मुख्य सनियंत्रण अधिकारी सुनील पवार यांचे मार्गदर्शनाखाली, ९ जानेवारी रोजी, दुपारी साडेबारा वाजण्यादरम्यान एपीएमसी मार्केट जवळील चेक पोस्टवर आचार संहिता कक्षाचे नोडल अधिकारी उपआयुक्त डॉ.अमोल पालवे व परिवहन उपक्रमाचे मुख्य लेखा आणि वित्त अधिकारीतुषार दौंडकर तसेच प्रशासकीय अधिकारीसंजीव पवार यांच्या नियंत्रणाखाली एकूण १६ लाख १६ हजार इतक्या किंमतीची रोकड पकडण्यात आली आहे. याबाबत पुढील कार्यवाही सुरू आहे.