ऐन गणेशोत्सवात सुधागडमध्ये तब्बल ८ तास वीज गूल ; झाड व वीज पडल्याने विद्युत तारा तुटल्या

 

बेणसे | ऐन गणेशोत्सवात बुधवारी (२७ ऑगस्ट) पहाटे चार ते दुपारी बारा वाजेपर्यंत सुधागड तालुक्याची वीज तब्बल आठ तास गुल होती. झाड व वीज पडल्याने विद्युत तारा तुटल्या आणि इन्सुलेटर फुटले यामुळे वीज पुरवठा खंडित झाला होता.

 

वारा पाऊस यामुळे उंबरवाडी येथील जंगलात एका ठिकाणी झाड कोसळून विजेच्या तारा दोन ठिकाणी तुटल्या तर येथे दुसर्‍या ठिकाणी वीज पडून इन्सुलेटर फुटले व विजेच्या तारा तुटल्या परिणामी संपूर्ण सुधागडतालुक्यातील वीज पुरवठा पहाटे चार वाजता खंडित झाला.

 

याबाबत पाली वीज वितरण कार्यालयाचे उपकार्यकारी अभियंता बालाजी चात्रे यांनी सांगितले की वीजपुरवठा खंडित झाल्यावर वीज महावितरणचे कर्मचारी लागलीच दोष (फॉल्ट) शोधण्यासाठी निघाले. त्यावेळी लक्षात आले की उंबरवाडी येथे फॉल्ट आहे. हे क्षेत्र पूर्ण डोंगराळ व दाट वनांचे आहे. त्यामुळे दोष झालेल्या ठिकाणी महावितरणचे कर्मचारी अथक परिश्रम घेऊन पोहोचले.

 

त्या ठिकाणी पोचल्यावर लगेच काम सुरू करण्यात आले, वीज महावितरणच्या कर्मचार्‍यांनी अथक परिश्रम करून अखेर वीजपुरवठा पुन्हा सुरळीत केला असे उपकार्यकारी अभियंता बालाजी चात्रे यांनी सांगितले. मात्र ऐन गणेशोत्सवात आठ तास वीजपुरवठा खंडित झाल्यामुळे सुधागडातील जनता हैराण झाली पावसाळ्यात वीज खांबावर वीज कोसळल्यामुळे तीव्र उच्च दाबामुळे विद्युत यंत्रणेतील सुरक्षा कवच असणार्‍या या इन्सुलेटर्सना तडे जातात व ते फुटतात.

 

म्हणून पावसाळ्यात वीज पुरवठा खंडीत होण्याचे प्रमाण वाढते. तेव्हा नेमका बिघाड शोधण्याकरीता रात्री-अपरात्री वीज कर्मचार्‍यांना गस्त घालावी लागते, कसून तपासणी करावी लागते. ती विद्युत वाहिनी कधी रस्त्याकडेने, कधी शेतातून, झाडी वनांतून तर कधी ओढयातून, डोंगरातून गेलेली असते.

विद्युत वाहिनीवर वीजतारा आणि वीज खांब यात विद्युतरोधक म्हणून चिनी मातीपासून बनवलेल्या साधनांचा वापर केला जातो. ३३ केव्ही /११ केव्ही या विद्युत वाहक उच्चदाब व विद्युत वितरण लघुदाब वाहिन्यात वापरल्या जाणा-या वेगवेगळ्या विद्युत रोधकांना प्रकारानुसार इंग्रजी भाषेत ‘पिन इन्सुलेटर’, डिस्क इन्सुटेलर, ‘सॅकल इन्सुलेटर’ असे संबोधले जाते.