कार्लेखिंड येथे दुर्गंधीयुक्त कचर्‍याचे ढिग , प्रवाशांना नाक बंद करुन करावा लागतो प्रवास

 

 

सोगाव | अलिबाग वडखळ मार्गावर निसर्गसौंदर्याने परिपूर्ण असलेल्या कार्लेखिंड येथील लहान पात्रुदेवी मंदिराजवळ असलेल्या मोकळ्या जागेत अज्ञात व्यक्तींकडून दररोज मोठ्या प्रमाणात कचरा टाकण्यात येत आहे. सदर ओला कचरा मोठ्या प्रमाणात टाकत असल्याने ते कुजल्यामुळे कुबट व घाण वास येत असतो.

 

यामुळे या मार्गावर प्रवास करणार्‍या सर्वांनाच नाक धरुन प्रवास करावा लागत आहे. कचर्‍यात ओल्या मच्छीची घाण, चिकनची घाण, कुजलेला फळे व भाजीपाला तसेच इतर मेलेले प्राणी याठिकाणी टाकत असल्याने ते कुजून मोठ्या प्रमाणात दुर्गंधी पसरुन घाण वास येत असल्याने भयंकर त्रास सहन करावा लागतो आहे. सदर कचरा टाकणार्‍या अज्ञात व्यक्तींविरोधात वन विभागाने कडक कारवाई करण्याची मागणी अनेकांनी केली आहे.

 

या कचरा टाकणार्‍या व्यक्तींच्या विरोधात यापूर्वी कारवाई करण्यात आली आहे, तरीही यापुढे कोणी कचरा टाकताना आढळल्यास त्यांच्याविरोधात कडक कारवाई करण्यात येईल. जागृत नागरिकांनी अशाप्रकारे कचरा टाकणार्‍या व्यक्तींची नावे अथवा माहिती द्यावी, जेणेकरुन आम्ही कारवाई करू शकू, असे अलिबाग वनविभाग परिमंडळ वनाधिकारी तुकाराम जाधव यांनी व्यक्त केले.