कशेडी घाटाला पर्यायी भुयारी मार्गावर तिसर्‍यांदा दरड कोसळली

 

 

पोलादपूर | मुसळधार सुरू झालेल्या पावसामुळे मुंबई गोवा महामार्गावरील कशेडी घाटात खेड हद्दीत भुयारी मार्गापासून २०० मीटर अंतरावर दरड कोसळण्याची घटना तीन महिन्यांत तिसर्‍यांदा घडली आहे. गेल्या मे व जून महिन्यातसुद्धा याच ठिकाणी दरड कोसळून वाहतुकीला अडथळा निर्माण झाला होता.

 

मंगळवारी पुन्हा कशेडी भुयारी मार्गाजवळ दरड कोसळल्याने मुंबई दिशेने जाणारी वाहतूक एकाच लेनवरून सुरू करण्यात आल्याची माहिती प्राप्त झाली आहे. कशेडी घाटात प्रामुख्याने रत्नागिरी जिल्ह्यातील खेड तालुक्यातील भुयारी मार्गाजवळ वारंवार होणार्‍या घटना लक्षात घेऊन राष्ट्रीय महामार्ग बांधकाम विभाग आणि शिंदे डेव्हलपर्स कंपनीने आपत्कालीन परिस्थितीमध्ये रात्री अपरात्री कशेडी भुयाराच्या दोन्ही बाजूने टीम सज्ज ठेवणे गरजेचे बनले आहे.

 

पावसाळ्यात वेळोवेळी खंडित होणार्‍या विद्युत पुरवठ्यामुळे भुयारात प्रखर प्रकाशझोत आणि मिट्ट काळोखाचा सुरू होणारा खेळ वाहनचालकांसाठी अपघाताला निमंत्रण देणारा ठरण्याची शक्यता आहे.