उरण कोणाचीही जहागिरी नाही , खा.श्रीरंग बारणे यांचा टोला

 

 

उरण | उरण शहर कोणाचीही जहागिरी नाही. शिवसेना कार्यकर्त्यांना न्याय मिळत नसेल, तर त्यांना बळ देणे हे माझे कर्तव्य आहे. कितीही विरोध झाला तरी शिवसेनेच्या विस्तारासाठी मी आग्रही राहणार, अशा शब्दांत मावळचे खासदार श्रीरंग बारणे यांनी भाजपावर निशाणा साधला.

 

उरण नगर परिषदेच्या निवडणुकीत भाजपाने युतीतील मित्रपक्ष शिवसेनेला (शिंदे गट) पूर्णपणे दूर लोटल्याने शिवसेनेने नगराध्यक्ष व चार नगरसेवक पदांसाठी स्वतंत्र उमेदवार उभे केले आहेत. ही बंडखोरी खासदार बारणेंच्या पाठिंब्यामुळेच झाली असल्याचा आरोप भाजप आमदार महेश बालदी यांनी केला. "मैत्री धर्मात केलेल्या उपकारांची ही परतफेड असेल, तर पुढील लोकसभा निवडणुकीत बारणे यांना भाजपा कोणतीही मदत करणार नाही,”असा संताप व्यक्त करत त्यांनी बारणेंवर टीकास्त्र सोडले. खासदार बारणे यांनी मात्र आपल्यावरचे आरोप फेटाळून लावत "मी कोणत्याही डीलमध्ये सहभागी नाही.

 

टक्के वाढीचे राजकारण कोण करत आहे हे उरणकरांना माहिती आहे,” असे ठामपणे म्हटले. शिवसेना कार्यकर्त्यांना या निवडणुकीत अन्याय होत असल्याने त्यांच्या नाराजीची दखल घेणे गरजेचे असल्याचेही त्यांनी स्पष्ट केले."भाजपाने मोठ्या मनाने दोन जागा दिल्या असत्या, तर आम्हाला विरोधात उभे राहण्याची वेळ आली नसती,”असेही त्यांनी नमूद केले. यावेळी बारणेंनी आमदार बालदी यांना थेट इशारा देत "जो शिंदे साहेबांच्या विरोधात बोलेल, त्याला जागा दाखवून देऊ,” असे म्हटल्याने राजकीय वातावरण आणखी तापले आहे.

 

गेल्या लोकसभा निवडणुकीत उरण विधानसभा मतदारसंघातील भाजप कार्यकर्त्यांनी बारणे यांच्या विजयासाठी मोठे योगदान दिले होते. त्या निवडणुकीत त्यांना मोठे मताधिक्य मिळाले होते. त्यामुळे आजच्या परिस्थितीत बारणे यांचा उरण नगर परिषदेतील हस्तक्षेप हा आमदार बालदींच्या प्रतिष्ठेला थेट आव्हान असल्याचे भाजप कार्यकर्त्यांचे म्हणणे आहे. निवडणूक काळात मित्रपक्षच विरोधकांना बळ देऊ लागला, तर ती मैत्री नसून अवास्तव उन्माद असल्याची टीका करत भाजप कार्यकर्ते "हाच उन्माद भविष्यात बारणे यांना महागात पडेल,” अशी उघड चेतावणी देत आहेत.