भूत काढण्याच्या बहाण्याने अल्पवयीन मुलीवर बलात्कार , श्रीवर्धन येथील धक्कादायक प्रकार

 

 

श्रीवर्धन | भूत काढण्याच्या बहाण्याने अल्पवयीन मुलीवर एका इसमाने बलात्कार केल्याची धक्कादायक घटना श्रीवर्धनमध्ये समोर आली आहे. याप्रकरणी पोलिसांनी अ‍ॅट्रॉसिटी अ‍ॅक्टसह पोक्सोअंतर्गत गुन्हा दाखल केला आहे. आपल्या लहान मुलीला भुताने झपाटले आहे असा समज तिच्या आईचा झाला होता.

 

त्यामुळे ती चिंतेत होती. काही झालं तरी आपली मुलगी बरी झाली पाहिजे यासाठी ती प्रयत्न करत होती. याचा गैरफायदा तिच्या ओळखीच्या इसमाने घेतला. मुलीचे भूत काढण्यासाठी तिला घेऊन आपल्याला श्रीवर्धन येथे जावे लागेल असे त्या इसमाने सांगितले. त्याच्या बोलण्यावर सदर महिलेने विश्वास ठेवला आणि २२ नोव्हेंबर रोजी सायंकाळी सुमारे ७ वाजण्याच्या सुमारास तो इसम दोघींना गाडीमध्ये घेवून श्रीवर्धनला आला.श्रीवर्धन येथे पोहोचल्यानंतर आरोपीने मुलीच्या आईला विश्वासात घेत, समुद्रकिनारी बसायला सांगितले. त्यानंतर त्याने मुलीवर लैंगिक अत्याचार केला.

 

या कृत्याची माहिती त्या मुलीने तिच्या आईला दिल्यानंतर श्रीवर्धन पोलिसात धाव घेतली. याबाबत श्रीवर्धन पोलीस ठाण्यात अनुसुचित जाती/जमाती अधिनियम, पोक्सो कायद्यान्वये गुन्हा दाखल करण्यात आला असून अधिक तपास उपविभागीय पोलीस अधिकारी श्रीवर्धन सविता गर्जे करीत आहेत.