नगरपालिका निवडणूक प्रचारासाठी आणखी एक दिवसाची मुदतवाढ ! उमेदवारांसाठी खुशखबर!

 

 

अलिबाग | नगर पालिका निवडणुकीत जाहीर प्रचार करण्यासाठी निवडणूक आयोगाने मुदतवाढ दिली आहे. त्यामुळे उमेदवारांना मोठा दिलासा मिळाला आहे. प्रचाराला एक दिवसाची मुदतवाढ मिळाल्याने उमेदवारांना मतदारांपर्यंत पोहोचण्यासाठी आणखी एक दिवस वाढवून मिळाला आहे.

 

नगरपालिका निवडणुकीसाठी आता उमेदवारांना १ डिसेंबर रोजी रात्री १० वाजेपर्यंत प्रचार करता येणार आहे. यापूर्वी ही मुदत १० नोव्हेंबर पर्यंत होती. २ डिसेंबर रोजी निवडणूकीसाठी मतदान घेतले जाणार आहे. प्रचाराला वेळ कमी मिळणार असल्याने उमेदवारांनी नाराजी व्यक्त केली होती.

 

प्रमुख राजकीय पक्षांच्या उमेदवारांनी आपल्या उमेदवारी अर्जासोबतच आपापल्या पक्षांचे ए बी फॉर्म दिले होते. निवडणूक चिन्ह निश्चित असल्याने राजकीय पक्षाच्या उमेदवारांनी अर्ज भरताच प्रचाराला सुरूवात केली होती. मात्र अपक्ष उमेदवारांची मोठी अडचण झाली होती. उमेदवारी अर्ज मागे घेण्याची मुदत २१ नोव्हेंबर रोजी संपली मात्र चिन्ह वाटप २६ नोव्हेंबर रोजी करण्यात आले. अपक्ष उमेदवारांना त्याच दिवशी चिन्ह मिळाले. तेव्हांपासूनच त्यांचा प्रचार सुरू झाला.

 

रायगड जिल्हयात ८ अपक्ष उमेदवार नगराध्यक्ष पदाची निवडणूक लढवत आहेत तर नगरसेवक पदासाठी ८२ अपक्ष उमेदवार आपले भवितव्य अजमावत आहेत. आपले निवडणूक चिन्ह मतदारांपर्यंत पोहोचवण्यासाठी त्यांना खूपच कमी कालावधी मिळणार असल्याने अनेक अपक्ष उमेदवारांनी नाराजी व्यक्त केली होती. परंतु आता १ डिसेंबर रोजी रात्री १० वाजेपर्यंत प्रचार करता येणार असल्याने उमेदवार आणि त्यांच्या कार्यकर्त्यांना दिलासा मिळाला आहे.

जिल्ह्यातील नगरपरिषद निवडणुकीसाठी २ डिसेंबर रोजी मतदान होणार आहे. मतदार संघांच्या मतदार यादीत समाविष्ट असलेल्या प्रत्येक मतदाराला मतदान करता यावे, मतदाराला आपला मतदानाचा हक्क बजावता यावा, तसेच मतदान सुरळीतपणे पार पडणे आवश्यक असल्याने मतदानाच्या दिवशी जिल्ह्यातील नगरपालिका क्षेत्रात ज्या ठिकाणी आठवडा बाजार भरणार आहे, अशा सर्व ठिकाणी आठवडा बाजार पूर्णवेळ बंद राहणार आहेत. मतदानाच्या दिवशी आठवडा बाजार बंद ठेवण्याबाबतचा आदेश जिल्हाधिकारी किशन जावळे यांनी जारी केला आहे.