रेवदंडा-साळाव पुलाच्या कामाला सुरुवात , १ हजार २५० कोटींचा प्रकल्प | कामासाठी ३६ महिन्यांचा कालावधी

 

 

अलिबाग | रेवदंडा ते साळाव या महत्त्वाकांक्षी पुलाच्या कामाला प्रत्यक्ष सुरुवात करण्यात आली आहे. अलिबागचे आमदार महेंद्र दळवी यांनी या कामाचे भूमिपूजन केले. या नवीन पुलासाठी १२ हजार २५० कोटी रुपये खर्च येणार असून २०२८ पर्यंत हे काम पूर्ण होणे अपेक्षित आहे.

 

मुरुड आणि रोहा या दोन तालुक्यांना अलिबागला जोडणारा हा अत्यंत महत्वाचा पूल आहे.खर्‍या अर्थाने ज्यांना रायगडचे भाग्यविधाते म्हणता येईल असे स्व. ए.आर.अंतुले मुख्यमंत्री असताना त्यांनी १९८६ साली रेवदंडा साळाव पूल बांधला होता. त्यानंतर गेली ३९ वर्षे हा पूल पाण्याच्या लाटा झेलत उभा आहे. अनेकदा बार्जेसच्या, बोटींच्या धडका या पुलाने सहन केल्या आहेत. मात्र गेल्या काही वर्षांपासून तो धोकादायक बनला आहे. त्याच्यावरुन अवजड वाहतूक बंद करण्यात आली आहे.

 

पुलाची अवस्था लक्षात घेऊन अलिबागचे आमदार महेंद्र दळवी यांनी या पुलासाठी पाठपुरावा सुरु केला. सागरी महामार्गाअंतर्गत राज्य सरकारच्या रस्ते विकास महामंडळाकडून विधानसभा निवडणुकीच्या आधी, मुख्यमंत्री एकनाथ शिंदे यांच्या हस्ते साळाव पुलासह सात पुलांच्या कामाचे भूमिपूजन करण्यात आले होते. यानंतर पुलाचे काम सुरु होणे अपेक्षित होते. मात्र विविध परवानग्या आणि मान्यता मिळण्यासाठी एक वर्ष निघून गेले.

 

अखेर गुरुवारी (२७ नोव्हेंबर) साळाव पुलाचे कामाला प्रत्यक्ष सुरुवात झाली. यावेळी आमदार महेंद्र दळवी यांनी बॅ.अंतुले यांची आठवण काढली. स्व. बॅ.अंतुले साहेब यांच्या पावलावर पाऊल ठेवून काम करण्याचा आपला प्रयत्न असल्याचे सांगतानाच, मुख्यमंत्री आणि दोन्ही उपमुख्यमंत्र्यांनाही त्यांनी अलिबाग आणि मुरुडकरांच्यावतीने धन्यवाद दिले. तसेच पुलाचे काम सुरु होण्यासाठी थोडासा उशीर झाला असला तरी पूर्ण मात्र वेळेत होईल, असा विश्वासही त्यांनी व्यक्त केला आहे.

 

रेवंदडा-साळाव पुलासह ३.८२९ इतक्या लांबीचा अ‍ॅप्रॉच तयार करण्यात येणार असून यासाठी १ हजार २५० कोटी रुपये सरकारने मंजूर केले आहे. हे काम पूर्ण करण्याचा कालावधी ३६ महिने असणार आहे. अशोका बिल्डकॉन कन्स्ट्रक्शन लिमिटेड ही कंपनी या पुलाचे काम करणार आहे. अलिबाग, मुरुड व रोहा अशा तीन तालुक्यांना जोडणारा हा रेवदंडा-साळाव पूल आहे. अलिबाग, मुरुड हे तालुके धार्मिक, ऐतिहासिक व पर्यटनाच्या दृष्टीने महत्त्वाची मानले जातात. येथील समुद्रकिनारी वर्षभर लाखोंच्या संख्येने पर्यटक येतात. त्यामुळे याठिकाणी नवीन पूल होणे काळाची गरज असून, काम सुरु झाल्याने स्थानिक नागरिकांनी समाधान व्यक्त केले आहे.