नवी मुंबईत प्रारूप मतदार यादीत ४५ हजार दुबार नावे? मनसे, शिवसेना ठाकरे गटाचे आक्षेप

 

 

नवी मुंबई | नवी मुंबई महापालिका निवडणुकीसाठी २० नोव्हेंबरला जाहीर झालेल्या प्रारूप मतदार याद्यांवर आक्षेपांची मालिका सुरू झाली असून आतापर्यंत ३५० पेक्षा अधिक हरकती दाखल झाल्या आहेत. हरकती नोंदविण्याची मुदत २७ नोव्हेंबरपर्यंत होती; मात्र ती वाढवून ३ डिसेंबरपर्यंत करण्यात आली आहे.

 

मनसे आणि उबाठा पक्षाने मतदार याद्यांमधील त्रुटींवर आक्षेप घेतले असून प्रारूप यादीत ४५ हजार ५८८ दुबार मतदारांची नावे असल्याचा आरोप मनसेने केला आहे. मनसेचे नवी मुंबई शहराध्यक्ष गजानन काळे यांनी महापालिकेकडे याबाबत लेखी आक्षेप नोंदवून ही नावे तात्काळ वगळावीत, अशी मागणी केली आहे.

 

तर शिवसेनेने (ठाकरे गट) देखील दुबार नावे, मतदारांच्या छायाचित्रांचा अभाव, फक्त आयटीआर नंबर आणि फोटो असून नाव नसणे अशा अनेक तांत्रिक त्रुटींवर आक्षेप नोंदवले आहेत. दरम्यान, "दुबार नावांबाबत बीएलओंच्या मार्फत नियमानुसार कार्यवाही केली जाणार आहे अशी माहिती निवडणूक विभागाचे उपायुक्त भागवत डोईफोडे यांनी दिली आहे.

अंतिम मतदार यादी प्रसिद्ध | १० डिसेंबर २०२५

मतदान केंद्रांच्या ठिकाणांची यादी प्रसिद्ध : १५ डिसेंबर २०२५

मतदान केंद्रनिहाय मतदार यादी प्रसिद्ध : २२ डिसेंबर २०२५