पनवेल तालुक्यातील जावळे गाव हादरले.... कुटुंबाचा सामूहिक आत्महत्येचा प्रयत्न

 

नवी मुंबई | पनवेल तालुक्यामधील जावळे गावामध्ये एका कुटुंबाने सामूहिक आत्महत्येचा प्रयत्न केल्याची घटना घडली आहे. या कुटुंबातील ५ जणांपैकी एकजण मृतावस्थेत सापडला असून चौघांवर नवी मुंबईतील एमजीएम रुग्णालयात उपचार सुरू आहेत. याबाबत उलवे पोलीस अधिक तपास करीत आहेत.

 

दरम्यान, या घटनेमुळे परिसरात खळबळ उडाली आहे.जावळे गावात भाड्याच्या घरात राहणार्‍या एकाच कुटुंबातील पाचजण बेशुद्ध अवस्थेत सापडले. या पाचही जणांनी चहामधून विषारी द्रव्य पिऊन आत्महत्या करण्याचा प्रयत्न केल्याचे पोलिसांच्या प्राथमिक तपासात समोर आले आहे. या घटनेतील एका पुरुषाचा मृत्यू झाला आहे. मूळचे नेपाळी असणारे हे एकाच कुटूंबातील सदस्य जावळे गावात अनेक दिवसांपासून राहत होते.

 

गेल्या दोन ते तीन दिवसांपासून त्यांच्या घराचा दरवाजा उघडला नसल्याने शेजार्‍यांनी अग्निशमन दल आणि पोलिसांना याबाबतची माहिती दिली. अखेर सुरक्षा यंत्रणेच्या जवानांनी घराचा दरवाजा उघडल्यानंतर कुटुंबातील पाचही जण बेशुद्ध अवस्थेत आढळले. उपचारासाठी या सर्वांना पनवेल येथील नानासाहेब धर्माधिकारी उपजिल्हा रुग्णालयात दाखल केल्यानंतर यामधील २२ वर्षीय संतोष बिरा लूहार याचा मृत्यू झाल्याचे डॉक्टरांनी सांगितले.

 

तसेच बेशुद्ध व्यक्तींमध्ये २३ वर्षीय रमेश बिरा लोहार, त्यांची पत्नी बसंती व पाच वर्षांचा मुलगा आयुष आणि दोन वर्षांचा आर्यन यांचा समावेश असून, त्यांच्यावर रुग्णालयात उपचार सुरु आहेत. अतिदक्षता विभागाची गरज असल्याने या चौघांना पुढील उपचारासाठी नवी मुंबई येथील रुग्णालयात हलविण्यात आले आहे. यातील दोन लहान मुलांची प्रकृती स्थिर असून आत्महत्येचे नेमके कारण अद्याप समजले नसल्याची माहिती उलवा पोलिसांनी दिली असून, या प्रकरणाचा अधिक तपास सुरु आहे.