कोकणात गावोगावी शिमगोत्सव , गावांमध्ये उत्साह, आनंद आणि भक्तीमय वातावरण

 

माणगाव | कोकणातील शिमगोत्सवाला यंदा उत्साहाची नवी उधळण लाभली असून गावोगावी लोककला सादर करणारे खेळे दाखल झाले आहेत. पारंपरिक वेशभूषा, ढोल-ताशांचा गजर आणि रंगीबेरंगी मिरवणुकीतून शिमगोत्सवाची रंगत अधिकच खुलते आहे. मनोरंजनासोबतच संस्कृतीचे जतन व संवर्धन करणार्‍या या लोककलेतून समाजजागृतीचे प्रभावी संदेश दिले जात आहेत.

 

समूहनृत्य, पारंपरिक गाणी, विनोदी व सामाजिक आशयाच्या सादरीकरणांमुळे ग्रामस्थ मंत्रमुग्ध होत आहेत. लहानांपासून थोरांपर्यंत तसेच महिलांचा उत्स्फूर्त सहभाग या उत्सवाचे वैशिष्ट्य ठरत आहे. या खेळांमध्ये पारंपरिक वाद्यांचा सुरेल संगम अनुभवायला मिळतो. ढोलकी, झांज, घुंगरू, काठ्या, तुणतुणे यांच्या तालावर कलाकार सादरीकरण करीत आहेत. ताल-लय-नृत्य यांचा सुंदर मिलाफ गावकुसात सांस्कृतिक जल्लोष निर्माण करीत आहे.

 

विशेष म्हणजे मुंबईकर चाकरमानीही आपल्या गावाकडे परत येऊन या लोककलेत सहभागी होत आहेत. त्यामुळे गाव आणि शहर यांतील भावबंध अधिक दृढ होत आहेत. शिमगोत्सवाच्या निमित्ताने एकोप्याचा संदेश देत, संस्कृतीची परंपरा पुढील पिढीकडे सुपूर्द करण्याचे कार्य या लोककलेतून होत असल्याचे ग्रामस्थांनी सांगितले. विविध प्रकारच्या वेशभूषा राधा कृष्ण, गौळणी, डेरे वाद्य वाजवणारे, स्त्री वेशभूषा परिधान केलेले कलाकार या कलेचे सादरीकरण करत आहेत. मनोरंजनासोबतच विचारांची देवाणघेवाण आणि सामाजिक भान जागवणारा हा शिमगोत्सव कोकणच्या सांस्कृतिक वैभवाची जिवंत परंपरा अधोरेखित करीत आहे.