अलिबाग | मनोरुग्णाकडून किमती वाहनांची तोडफोड

 

 

सोगाव | अलिबाग रेवस मार्गावर वरसोली फाट्याजवळपास दि. ५ ऑगस्ट रोजी सकाळी एका मनोरुग्णाने दगडाने या मार्गावरील अनेक वाहनांच्या काचांची तसेच काही घरांवर देखील दगडफेक केली. या प्रकारामुळे परिसरात घबराटीचे वातावरण पसरले होते. ज्या वाहनांचे नुकसान केले होते त्या वाहनमालकांनी त्या इसमाविरोधात अलिबाग पोलीस ठाण्यात तक्रार दाखल केली.

 

सदर इसम वाहनांवर दगडफेक करत अलिबागकडून रेवस बाजूला जात असताना दुपारच्या वेळी चोंढी येथील पिंट्या गायकवाड मित्रमंडळाच्या कार्यकर्त्यांनी चोंढी पुलाजवळ पकडून त्याला मांडवा सागरी पोलिसांच्या ताब्यात दिले. यावर मांडवा पोलिसांनी ताब्यात घेऊन पोलीस स्टेशनमध्ये नोंद करून त्वरित अधिक तपास केला असता तो परप्रांतीय असून बेवारस मनोरुग्ण असल्याचे निष्पन्न झाले असल्याचे पोलिसांनी सांगितले आहे.

 

यावेळी मांडवा पोलिसांनी वरिष्ठांच्या मार्गदर्शनाखाली ताबडतोब त्याचवेळी त्या मनोरुग्णाला कर्जतच्या सुधारगृहात रवाना करण्याचा निर्णय घेतला. यासाठी किहीम सरपंच पिंट्या गायकवाड यांनी पोलिसांना मोलाचे सहकार्य केले, पिंट्या गायकवाड मित्रमंडळाची रुग्णवाहिका विनामूल्य उपलब्ध करून त्या व्यक्तीला कर्जत येथील ‘श्रद्धा रिहाबिलिटीसन फाउंडेशन सुधारगृह’ येथे पाठवून दिले. त्या मनोरुग्णाला पोलिसांनी ताब्यात घेतल्याबद्दल नागरिकांनी सुटकेचा निःेशास घेतला.