माणगाव दक्षिण रायगडात विकासाचे मॉडेल ठरेल , खा.सुनील तटकरे यांचे प्रतिपादन

सौर पथदिवे, हायमास्ट कामाचे भूमिपूजन

By Raigad Times    29-Jul-2025
Total Views |
mangoan
 
माणगाव | माणगाव नगरपंचायत हद्दीतील विविध ठिकाणी गेल इंडिया लि.कंपनीच्या सीएसआर अंतर्गत सोलार हायमास्ट व सोलार पथदिवे बसविण्याच्या कामाचे भूमिपूजन खा. सुनील तटकरे यांच्या हस्ते पार पडले. विविध पायाभूत सुविधांच्या माध्यमातून सर्वांगीण विकास घडवून आणण्यासाठी मी कटिबद्ध आहे. मी माणगावकरांना जो शब्द देतो, तो मी पूर्ण करतो. माणगाव शहर हे नजीकच्या काळात दक्षिण रायगडातील विकासाचे मॉडेल ठरेल, असा विेशास खा.तटकरे यांनी बोलताना व्यक्त केला.
 
माणगावचे नाट्यगृह, बायपास, यासह अनेक विकासाचे प्रश्न मार्गी लावले जातील असे सांगत २ ऑगस्टला उपमुख्यमंत्री अजित पवार हे माणगाव मध्ये येणार असून ते अधिक विकासाच्या मुद्द्याला चालना देतील, असेही ते म्हणाले. यावेळी व्यासपीठावर माजी आ. अनिकेत तटकरे, माणगाव शिक्षण प्रसारक मंडळाचे अध्यक्ष अ‍ॅड. राजीव साबळे, नगराध्यक्ष शर्मिला सुर्वे, उपनगराध्यक्षा हर्षदा सोंडकर, माजी नगराध्यक्ष तथा नगरसेवक आनंद यादव, राष्ट्रवादी काँग्रेस पक्षाचे दक्षिण रायगड कार्याध्यक्ष सुभाष केकाणे, शादाब गैबी, राष्ट्रवादी काँग्रेस पक्षाचे ज्येष्ठ नेते शेखरशेठ देशमुख, माणगाव नगरपंचायत मुख्याधिकारी संतोष माळी, तहसीलदार दशरथ काळे, नगरपंचायतीचे नगरसेवक, अधिकारी व नागरिक मोठ्या संख्येने उपस्थित होते.
 
माणगाव नगरपंचायत हद्दीतील नागरी जीवन उजळवण्यासाठी गेल इंडिया कंपनीच्या सीएसआर (कॉर्पो रेट सामाजिक जबाबदारी) उपक्रमांतर्गत एक महत्त्वपूर्ण पाऊल उचलण्यात आले आहे. माणगावात विविध ठिकाणी सौर पथदिवे आणि हायमास्ट दिवे बसविण्याच्या कामाचा भूमिपूजन सोहळा खा. सुनील तटकरे यांच्या हस्ते माणगाव बाजारपेठेत शनिवारी (२६ जुलै) सायंकाळी ४ वाजता उत्साहात पार पडले.
 
या उपक्रमासाठी २.५ कोटी रुपयांचा निधी खर्च करण्यात येणार आहे. या योजनेंतर्गत माणगाव शहरात १४४ सौर पथदिवे आणि २० सौर हायमास्ट दिवे बसविण्यात येणार आहेत. यामुळे शहरातील अंधारयुक्त रस्ते, गल्ल्या आणि सार्वजनिक ठिकाणे प्रकाशमान होणार असून, नागरिकांच्या सुरक्षिततेत मोठी भर पडणार आहे. विशेषतः महिलांसाठी आणि विद्यार्थ्यांसाठी रात्रीचा प्रवास अधिक सुरक्षित आणि सोयीस्कर होईल.
 
यावेळी उपस्थित मान्यवरांनी सौरऊर्जे चा वापर करून पर्यावरणपूरक आणि दीर्घकालीन ऊर्जा साधनांचा अवलंब करण्याचे महत्त्व अधोरेखित केले. खासदार तटकरे यांनी या उपक्रमाबद्दल समाधान व्यक्त करत सांगितले की, सौर ऊर्जा हा पर्यावरण स्नेही पर्याय आहे. अशा योजनांमुळे ग्रामीण व अर्धशहरी भागात स्वच्छ व स्वयंपूर्ण ऊर्जेची वाट निर्माण होते. या कार्यक्रमास माणगाव नगरपंचायतीचे पदाधिकारी, कर्मचारी, स्थानिक नागरिक, सामाजिक कार्यकर्ते मोठ्या संख्येने उपस्थित होते. हा उपक्रम माणगाव शहराच्या शोशत विकासासाठी एक सकारात्मक पाऊल ठरू शकतो, अशी प्रतिक्रिया नागरिकांमधून उमटू लागल्या आहेत. यामुळे सौरऊर्जेच्या प्रकाशात माणगावाचा नवा उज्ज्वल प्रवास सुरू होणार आहे.