पनवेलचे पोलीस उपनिरीक्षक सचिन वाईकर यांना लाच घेताना अटक

 

 

पनवेल | अंतरिम जामीन नामंजूर करुन वडिलांना अटक करेन, अशी भीती दाखवत ५० हजारांची लाच घेताना पनवेल शहर पोलीस ठाण्याचे पोलीस उपनिरीक्षक सचिन वाईकर यांना लाचलुचपत प्रतिबंधक विभागाच्या पथकाने अटक केली आहे.

 

तक्रारदार यांच्या वडिलांविरुध्द पनवेल शहर पोलीस ठाणे येथे दाखल असलेल्या गुन्ह्यामध्ये कलम वाढ करुन, तक्रारदार यांच्या वडिलांचा अंतरिम जामीन नामंजूर करुन त्यांना अटक करेन, अशी भीती घालत असल्याबाबत व अटक न करण्याकरिता पनवेल शहर पोलीस ठाण्याचे पोलीस उपनिरीक्षक सचिन वामन वाईकर यांनी १ लाख रुपयांची मागणी करीत असल्याबद्दल लाचलुचपत प्रतिबंधक विभागाकडे तक्रार प्राप्त झाली होती.

 

२१ जुलै रोजी मारुती कुशन, छत्रपती शिवाजी महाराज चौक पनवेल येथे सापळा लावला असता पोलीस उपनिरीक्षक सचिन वाईकर यांनी मागणी केल्याप्रमाणे लाचेची रक्कम ५० हजार रुपये सचिन वाईकर यांनी त्यांच्या वॅगनार कारमध्ये खाजगी इसम रविंद्र उर्फ सचिन सुभाष बुट्टे याच्यामार्फत स्वीकारल्याचे आढळून आले.

 

त्याचवेळी त्यांना रंगेहाथ पकडण्यात आले. लाचलुचपत विभाग रायगडच्या पोलीस उपअधिक्षक सरिता भोसले, पोलीस निरीक्षक निशांत धनवडे, सहाय्यक फौजदार विनोद जाधव, पोलीस हवालदार महेश पाटील, पोलीस शिपाई नवदीत नांदगावकर यांच्या पथकाने सापळा रचून ही कारवाई केली आहे.